Los anarcosindicalistas lluchamos pola meyora social y llaboral de la clase trabayadora. Pero tamién, dende los entamos de la nuesa trayectoria histórica, propunximos siempres un modelu de sociedá basáu na llibertá y la xusticia, ensin gobernantes nin gobernaos, autogestionado, onde los seres humanos puedan desenvolver al máximu les sos capacidaes. El nuesu modelu social llámase comunismu llibertariu y a él aspiramos.
Defendimos siempre que los colectivos humanos puedan espresase llibremente, puedan xenerar colectivamente proyectos que los ameyoren como individuos y como sociedá.
Güei celebróse’l Día de les Lletres Asturianes y defendióse na cai l’asturianu como llingua oficial.
¿Defendemos los anarcosindicalistas la oficialidá del asturianu? Rotundamente sí.
Lo que realmente defendemos ye’l derechu a que la fala de los asturianos y asturianes, históricamente escorrida, dexe de tar discriminada. La llamada oficialidá contribuyiría a poner la nuesa llingua de pies d’igualdá con otres llingües ibériques evitando asina la so desapaición, daqué que, si nun torgar, va acabar siendo una realidá en non demasiaos años.
Los pueblos ibéricos compartieron nel so aportar hestóricu munches coses, pero tamién tuvieron siempres marcaes diferencies culturales. Estos pueblos espresáronse nes sos llingües propies, pero les distintes llingües romances provenientes del llatín (sacantes el euskera) fueron adulces aniquilaes pola llingua castellana na so espansión política sobro’l restu de los pueblos peninsulares.
Sacantes el gallegu, el euskera y el catalán, otres llingües peninsulares procedentes tamién del llatín como l’asturianu, fueron reprimíes y escorríes hasta la so práctica desapaición, tantu por razones polítiques como de clase (l’asturianu siempre foi consideráu pola burguesía como un idioma pueblerino, malsonante y balbuceante (d’ende que se llamara despectivamente bable).
La oficialidá, xuntu cola educación nes escueles, ye lo que ye güei la única manera de detener la desapaición de la llingua histórica de los y los asturianos y asturianes, reconociendo dientro de la mesma tola so variedá y riqueza.
Defendemos la oficialidá de la llingua asturiana
Paremos la discriminación escontra la nuesa llingua
Esiximos que l’asturianu tea de pies d’igualdá col castellán